मुसहर बस्तीको ७५ प्रतिशत काम सकियो, छाना हाल्ने काम सुरु
२५ फागुन, काठमाडौं । २ महिना पहिले महजोडीले शिलान्यास गरेको बर्दिवास-२ महोत्तरीमा बनिरहेकोे एकिकृत नमुना मुसहर बस्तीको ७५ प्रतिशत काम सकिएको छ ।
नमुना बस्तीका परियोजना ब्यवस्थापक अर्जुन न्यौपानेका अनुसार मुसहर बस्ती निर्माणका लागि अब लगभग २५ प्रतिशत मात्र काम बाँकी छ ।
पहिलो महिना ३० प्रतिशत काम सकाएको फाउण्डेशनले तीव्र गतिमा काम गरिरहेको छ । बस्तीको कामले ब्यस्त र आफै श्रमदानमा खटिरहेका फाउण्डेशनका अध्यक्ष कट्टेलले नयाँ बर्षमा जसरी भएपनि मुसहर समुदायलाई बस्ती हस्तान्तरण गरिने बताएका छन् ।
‘हामीले सोचेभन्दा छिटो काम भईरहेको छ’ उनले भने ‘निर्माण कार्यमा साथ र सहयोग गरि हौसला दिनुहुने सम्पूर्णलाई धन्यवाद दिन चाहान्छौ ।’
गर्मी बढिरहेको समयमा धुर्मुस सुन्तलीले गरेको निर्माण कार्यका लागि सहयोग रकम उठ्ने कार्य पनि निरन्तर जारी छ । फाउण्डेशनका लेखा अधिकृत सरोज जंग खत्रीले दिएको जानकारीअनुसार अहिलेसम्म फाउण्डेशनलाई २ करोड १० लाख अनुदान प्राप्त भएको छ ।
जसमा कृषि विकास बैंकमा रहेको १ करोडसहित फाउण्डेशनसँग ३ करोड १० लाख बराबरको सहयोग प्राप्त भएपनि रकम तीब्र गतिमा खर्च भइरहेको छ । खत्रीलेे फाउण्डेशनले २ करोड १५ लाख भन्दा बढी रकम खर्च गरिसकेको बताए ।
0 comments
Write Down Your Responses