समाचार » सप्तरीमा मृतकको संख्या : काठमाडौँमा मधेशी मोर्चाले भन्छ चार, सप्तरीको मोर्चा भन्छ तीन read

काठमाडौँ – हिजो नेकपा एमालेले सप्तरीमा गरेको जनसभामा भएको प्रहरी र आन्दोलनको झडपमा मृत्यु भएका मोर्चाका कार्यकर्ताहरुको संख्याबारे मधेसी मोर्चामा नै अन्यौलता देखिएको छ । संयुक्त लोकतान्त्रिक मधेशी मोर्चाको सोमबार राती बसेको आकस्मिक बैठकपछि विज्ञप्ति जारी चार जनाको मृत्यु भएको उल्लेख गरेको थियाृ । मधेशी मोर्चाले जारी गरेको विज्ञप्तिमा सञ्जन मेहता, दिगम्बर यादव, पीताम्बरलाले मण्डल र आनन्द साह मृत्यु भएको उल्लेख गरिएको छ । यता, सप्तरीका मधेशी मोर्चाले हालसम्म तीनजनाको मृत्यु भएको बताएको छ । सप्तरीमा रहेका राष्ट्रिय मधेश समाजवादी पार्टीका केन्द्रीय सचिव गजेन्द्र मण्डलले हालसम्मको तीनजनाको मृत्यु भएको पुष्टि भइसकेको बताए । यता मधेशी मोर्चाका नेता एवं तराई मधेश लोकतान्त्रिक पार्टीका अध्यक्ष महेन्द्रराय यादवसँग जिज्ञासा राख्दा उनले समाचारमाध्यममा आएका तथा जिल्लास्थित नेता तथा कार्यकर्ताहरुले दिएको जानकारीको आधारमा विज्ञप्ति जारी गरेको बताए । ‘हालसम्म मृतकको संख्या कन्फर्म छैन । कोही सात भन्छन्, कोही भने चार भन्दैछन्, कोहीले तीन भन्छन्,’ उनले भने । गृहमन्त्रालयले मध्यरात विज्ञप्ति जारी गर्दै मृतकको संख्या ३ रहेको बताएको थियो । संघीय समाजवादी फोरम नेपालका कार्यालयमा अहिले संघीय गठबन्धनको बैठक बसिरहेको छ । हिजो सप्तरीमा भएको घटनालाई लिएर आगामी रणनीतिको बारेमा छलफल हुने बताइएको छ । त्यसैगरि, दिउँसो तीन बजे मधेशी मोर्चाको बैठक बस्ने भएको छ ।

0 comments

Write Down Your Responses